அதிரையில் வாய்ஜாலம் காட்டி பல லட்சம் மோசடி.. ஊரே மதிக்கும் நபரின் சதுரங்க வேட்டை!

ஆசிரியர் குறிப்பு: அதிரையில் 99.9% உலமாக்கள் இறைப்பணிக்காக பல உலக ஆசைகளை விட்டுவிட்டு தங்களையே அர்ப்பணித்து எளிய வாழ்க்கை வாழ்ந்து வருகிறார்கள். இப்படிபட்ட சூழலில் ஒருவர் இதுபோன்ற மோசடியில் ஈடுபட்டுவிட்டார் என்பதற்காக உலமாக்களை தவறாக சித்தரிக்க வேண்டும் என்ற நோக்கத்தில் இப்பதிவை நாம் வெளியிடவில்லை. இதுபோன்ற அடையாளங்களைத் தவறாக பயன்படுத்தி மோசடிக்காரர்கள் மக்களை ஏமாற்றக் கூடும் என்பதால் யாராக இருந்தாலும் தீர விசாரித்து இறங்க வேண்டும் என்ற விழிப்புணர்வை ஏற்படுத்துவதற்காகவே இப்பதிவு.

அதிரையில் பல ஆண்டுகளாக தங்கி இருந்த வெளியூரைச் சேர்ந்த பேச்சாற்றல் கொண்ட நபர் மீது அதிரை மக்கள் பெரும் மதிப்பும் மரியாதையும் வைத்திருந்தனர். அவர் சொல்வதெல்லாம் சரி என்று நம்பி அவர் அறிமுகம் செய்த தொழிலில் லட்சக்கணக்கில் முதலீடு செய்துள்ளனர்.

என்ன தொழில்? எப்படி வருமானம் கிடைக்கும்? என்ற கேள்விகளுக்கெல்லாம் முறையாக பதிலளிக்காமல் என் மீது நம்பிக்கையில்லையா? என்று கேட்டே பலரை முதலீடு செய்ய வைத்திருக்கிறார். நாட்கள் செல்ல செல்ல முதலீடு செய்தவர்களுக்கு தாங்கள் மோசடி செய்யப்பட்டுள்ளோம் என்ற விபரம் தெரியவரவே அவரிடம் இதுகுறித்து வினவியுள்ளனர். அப்போதும் தனது வாதத்திறமையால் அவர்களை சமாதானப்படுத்தி அனுப்பி இருக்கிறார். 

முதலீடு செய்த பணத்திற்கு பகரமாக சில நூறு, சில ஆயிரங்கள் மதிப்புடைய தரமற்ற பொருட்களை லட்சங்களில் பில் போட்டு கொடுத்துள்ளார். இதனால் அதிர்ச்சியடைந்த மக்கள் இது தொடர்பாக கேட்டபோதுதான் அது 2019 ஆம் ஆண்டே ஊழல் என்று அறிவிக்கப்பட்ட Q NET எம்.எல்.எம் மோசடி என்பது தெரியவந்துள்ளது. இது தொடர்பாக அப்போதே காவல் துறை கைது நடவடிக்கைகளையும் மேற்கொண்டுள்ளது. ஆனாலும் அதன் பெயரில் நடைபெறும் மோசடி அதிரையில் தொடர்கிறது. 

Advertisement:

Q NET என்றால் என்ன?

எம்.எல்.எம் (MLM) என்றழைக்கப்படும் மல்டி லெவல் மார்கெட்டிங் (MULTI LEVEL MARKETING) முறை மூலம் QI நிறுவனம் இயங்குகிறது. ஹாங்காங்கில் இருந்து மலேசியா, சிங்கப்பூர், துபாய், இந்தோனேசியா, இந்தியா ‌என பல நாடுகளுக்கு தனது தொழிலை விரிவுபடுத்தினார் விஜய் ஈஸ்வரன். தங்கம் மற்றும் வெள்ளிக்காசு விற்பனை மூலம் தனது மோசடிப் பயணத்தை தொடங்கியது QI நிறுவனம். ‌இதன் இந்திய கூட்டாளி விஷான் டைரெக்ட் செல்லிங் (VIHAAN DIRECT SELLING) என்ற நிறுவனம். பில்லியர்ட்ஸ் வீரரும், பத்மபூஷண் விருது பெற்றவருமான மைக்கேல் பெரேராதான் இதன் உரிமையாளர். 

இந்த நிறுவனம்தான் கியூ நெட் (QNET) மோசடியை இந்தியா முழுவதும் அரங்கேற்றியுள்ளது. ஆன் லைன் வர்த்தகம் என்பதுதான் கியூ நெட்டின் (QNET) அடிநாதம். ஏற்கெனவே கியூ நெட்டில் (QNET) சேர்ந்தவர் தனது நண்பர்கள் மற்றும் உறவினர்களை அந்த திட்டத்தில் சேரும்படி அழைப்பு விடுப்பார். ஆன் லைன் வர்த்தகம். கை நிறைய காசு. மற்ற தொழிலை காட்டிலும் விரைவாக அதிக வருவாயை ஈட்ட முடியும் எனக்கூறுவார்களே தவிர அது என்னவென்று தெளிவாக சொல்ல மாட்டார்கள். பணத்தாசை காட்டி மூளைச்சலவை செய்து சில லட்சங்கள் வரை கரந்து விடுவார்கள். 

மூளைச்சலவை செய்வதற்கு இந்தக் கும்பல் காபி ஷாப், மால்கள் மற்றும் பெரிய திருமண மண்டபங்களை தேர்வு செய்யும். என்ன பிசினஸ் என கேட்டால் பின்னால் புரியும் என்பார்கள். இப்படி பேசிப்பேசி பணத்தை பறித்த பின்தான் இந்தக் கும்பலின் உண்மை முகம் தெரிய வரும். 2019 நிலவரப்படி அதற்கு முந்தைய ஆண்டுகளில் தமிழகத்தில் சற்று ஏறக்குறைய 20 ஆயிரம் பேர் கியூ நெட் (QNET) கும்பலிடம் சிக்கி சுமார் 30 ஆயிரம் கோடி ரூபாயை இழந்திருப்பதாக கூறப்படுகிறது.

தமிழகத்தில் மட்டுமல்ல இந்தியா முழுவதும் பல்லாயிரம் கோடி ரூபாய் அளவிற்கு கியூ நெட் (QNET) மோசடி அரங்கேறியுள்ளது. இதுதொடர்பாக கடந்த 2019 ஜனவரி மாதம் 58 பேரை தெலங்கானா மாநிலம் சைபராபாத் காவல்துறையினர் கைது செய்தனர். கியூ நெட் (QNET) நிறுவனத்தின் விளம்பரங்களில் நடித்ததற்காக பிரபல நடிகர்கள் ஷாருக்கான், பொம்மன் இரானி, அனில் கபூர், ஜாக்கி ஷெராப், விவேக் ஓபராய், நடிகை பூஜா ஹெக்டே, கிரிக்கெட் வீரர் யுவராஜ் சிங் ஆகியோருக்கு சைபராபாத் காவல்துறையினர் நோட்டீஸ் அனுப்பினர். 

விஷான் டைரெக்ட் செல்லிங் (VIHAAN DIRECT SELLING) நிறுவனத்தின் உரிமையாளர் மைக்கேல் பெரேரா கைது செய்யப்பட்டு ஜாமீனில் விடுவிக்கப்பட்டார். கியூ நெட் (QNET) மோசடி தொடர்பாக தமிழகம் மற்றும் கர்நாடகாவிலும் சிலர் கைது செய்யப்பட்டுள்ளனர். 

விஷான் டைரெக்ட் செல்லிங் (VIHAAN DIRECT SELLING) ஒரு மோசடி நிறுவனம் என மத்திய நுகர்வோர் பாதுகாப்பு, உணவு மற்றும் பொதுவிநியோகத்துறை அமைச்சகம் அறிவிக்கை வெளியிட்டுள்ளது. ஆனால் மக்கள் ஏமாறுவது மட்டும் நின்றபாடில்லை. கியூ நெட் (QNET) கும்பல் மக்களை ஏமாற்றியது மட்டுமின்றி பிறரை எப்படி ஏமாற்றுவது என அவர்களுக்கு கற்றுக்கொடுத்திருக்கிறது என மும்பை உயர்நீதிமன்றம் கூறியதே இந்த மோசடியின் தீவிரத்தை உணர்த்துகிறது.

ஆனால் இத்தகைய மோசடியை ஊருக்கு உபதேசம் செய்பவரே செய்திருப்பதுதான் வேதனை. இவ்வளவு பேர் பாதிக்கப்பட்டும் தான் செய்வது தவறு என்று அவர் ஒப்புக்கொள்ளவில்லை என்று வருந்துகிறார்கள் பணத்தை பறிகொடுத்தவர்கள்.

கால ஓட்டம், தொழில்நுட்ப வளர்ச்சிக்கு ஏற்ப ஹலாலான மற்றும் ஹராமான முறையில் பல்வேறு பொருளீட்டும் முறைகள் வந்துவிட்டன. எனவே மார்க்க அறிவுடன் பொருளாதார மற்றும் தொழில்நுட்ப அறிவுகொண்ட உலமாக்கள் தேவை என்று நாம் பல இடங்களில் கூறி வருகிறோம். இப்படி இருக்க ஒருவர் இப்படி தன் மீது மக்கள் வைத்திருக்கும் நம்பிக்கையை தவறாக பயன்படுத்தி அவர்களிடம் முறைகேட்டில் ஈடுபட்டிருப்பது அதிர்ச்சியை ஏற்படுத்தியுள்ளது. இவர் தற்போதும் எந்த குற்ற உணர்வுமின்றி அதிரைக்கு வந்து செல்வதாகவும், பணத்தை இழந்த தங்கள் பாடுதான் திண்டாட்டமாக உள்ளது எனவும் மக்கள் வேதனையுடன் தெரிவித்தனர்.