தமிழகத்தில் உள்ள மாநகராட்சிகள், நகராட்சிகள், பேரூராட்சிகளில் தமிழக அரசு கடந்த ஏப்ரல் மாதம் சொத்து வரியை உயர்த்தியது. 600 சதுர அடிக்கும் குறைவான குடியிருப்புக் கட்டடங்களுக்கு 25 சதவிகிதமும், 601 முதல் 1,200 சதுர அடி வரையிலான கட்டடங்களுக்கு 50 சதவிகிதமும், 1,201 முதல் 1,800 சதுர அடி வரையிலான கட்டடங்களுக்கு 75 சதவிகிதமும், 1,800 சதுர அடிக்கும் அதிகமுள்ள கட்டடங்களுக்கு 100 சதவிகிதம் சொத்து வரி உயர்த்தப்பட்டுள்ளது.
அதேபோல் காலி மனைகளுக்கான சொத்து வரியும் 100 சதவிகிதம் உயர்த்தப்பட்டு இருக்கிறது. அதிராம்பட்டினம் அண்மையில் நகராட்சியாக மாற்றப்பட்ட பகுதி. பேரூராட்சியாக இருந்தபோதே நகராட்சிக்கு இணையாக அதிகளவில் வரியை செலுத்தி வந்திருக்கிறோம். ஏற்கனவே கஜா புயலால் வீடுகள், கடைகள், தென்னந்தோப்புகள் கடும் சேதமடைந்து கோடிக்கணக்கில் இழப்பு ஏற்பட்டுள்ளது.
அதை தொடர்ந்து வந்த கொரோனா ஊரடங்கால் பொருளாதார நெருக்கடியில் சிக்கிய நாங்கள் அதிலிருந்து இன்னும் மீண்டு வரவில்லை. இந்த சூழலில் சொத்துவரி உயர்வு எங்கள் பகுதி மக்களுக்கு பேரிடியாக அமைந்தது.
அதேபோல் அதிராம்பட்டினம் நகராட்சிக்கு உட்பட்ட பகுதிகளில் 3 மண்டலங்களாக பிரித்து வரிவசூல் செய்வது தொடர்பாக கடந்த 12/04/2022 அன்று அறிவிப்பு ஒன்று வெளியானது. நகராட்சி அலுவலகத்தில் ஒட்டப்பட்ட மூன்று மண்டலங்களின் பட்டியலில் உள்ள தெருக்களில் A மற்றும் B மண்டலங்களில் உள்ள தெருக்கள் பலவற்றில் சாலை வசதிகள், கழிவுநீர் வடிகால் வசதிகள், கால்வாய் வசதிகள் உள்ளிட்ட அடிப்படை கட்டமைப்பு வசதிகள் எதுவும் இல்லாமல் உள்ளன. அதே நேரம் B மண்டலத்தில் உள்ள தெருக்களில் இருக்கும் வீடுகளுக்கு A மண்டலத்திற்கு விதிக்கப்படும் விகிதத்தில் வரி வசூல் செய்யப்படுவதாகவும் குற்றச்சாட்டு எழுந்தது.
இருப்பினும் சொத்து வரி குறைக்கப்படவில்லை. நகராட்சியில் இருந்து அதிகாரிகள் வீடு வீடாக சென்று சொத்துவரி உயர்த்தப்பட்டதற்கான சான்றிதழை வழங்கி கையோப்பம் பெற்று வருகின்றனர். இதனால் மக்கள் அதிர்ச்சியடைந்துள்ளனர். மேலும் சொத்து வரி உயர்வை திரும்பப்பெற வேண்டும் எனவும் அவர்கள் கேட்டுக்கொண்டுள்ளார்.
