தெற்கு ரயில்வேயில் இதுவரை 82 சதவீத ரயில் பாதைகள் மின்மயமாக்கப்பட்டு உள்ளன. தமிழகத்தில் கடந்த 8 ஆண்டுகளில் 1,664 கிலோ மீட்டா் ரயில் பாதை மின்மயமாக்கப்பட்டுள்ளது. அந்த வகையில் அதிரை ரயில் வழித்தடத்தை மின்மயக்கும் பணிகளும் விரைவில் தொடங்கப்பட உள்ளன.
அதிராம்பட்டினம் வழியாக இயக்கப்படும் திருவாரூர் - காரைக்குடி, திருத்துறைப்பூண்டி - அகஸ்தியம்பள்ளி மற்றும் தஞ்சாவூர் - பட்டுக்கோட்டை, மன்னார்குடி - பட்டுக்கோட்டை ஆகிய ரயில் பாதைகளுக்கு மின்மயமாக்கும் பணிகள் தொடர்பாக ரயில்வே வாரியம் தெற்கு ரயில்வேக்கு மதிப்பீடு செய்ய உத்தரவிட்டுள்ளது.
கடந்த 2019 ஆம் ஆண்டு திருவாரூர் - காரைக்குடி இடையே ரயில் சேவை தொடங்கப்பட்டது. ஆனால், கேட் கீப்பர் இல்லாத காரணத்தால் பல இடங்களில் நிறுத்தி நிறுத்தி ரயில்கள் இயக்கப்பட்டன. இதனால் பயண நேரம் தாமதமானது. 2 ஆண்டுகளுக்கு பிறகு கேட் கீப்பர்கள் நியமிக்கப்பட்டதால் தற்போது பயண நேரம் பாதியாக குறைந்துள்ளது. இருப்பினும் அகல ரயில்பாதை அமைக்கப்பட்டு 4 ஆண்டுகளாகியும் இப்பகுதி மக்களின் முக்கிய கோரிக்கையான சென்னைக்கு நேரடி ரயில் இயக்க வேண்டும் என்பது நிறைவேற்றபடாத ஒன்றாகவே இருந்து வந்தது.
இந்த நிலையில் கடந்த சில மாதங்களுக்கு முன்பாக அதிரை வழியாக வேளாங்கண்ணி - கேரள மாநிலம் எர்ணாகுளம் வரை செல்லும் வாராந்திர ரயில் சேவை தொடங்கப்பட்டது. இதற்கு பலத்த வரவேற்பு கிடைத்ததை தொடர்ந்து அதிரை வழியாக சென்னை செல்லும் செகந்திராபாத் வாரந்திர ரயில் சேவையும் கடந்த சில வாரங்களுக்கு முன்பாக தொடங்கப்பட்டது குறிப்பிடத்தக்கது.
